Hvítvín og rauðvín ársins 2018 valin af Víngarðinum koma bæði frá Vínfélaginu.

Víngarðurinn þar sem Þorri Hringsson skrifar um vín hefur valið bestu hvítvín og rauðvín ársins 2018.  Hvítvín ársins að hans mati eru Dr. Loosen Wehlener Sonnenuhr Trocken GG 2015 sem fékk frábæra umsögn hjá honum og var eina hvítvínið sem fékk 5 stjörnur hjá Víngarðinum árið 2018.

Dr. Loosen Wehlener Sonnenuhr Riesling Großes Gewächs Dry 2015 *****

Ég segi fyrir mig, þá er Riesling ein af þremur bestu hvítvínsþrúgum sem þessi veröld hefur töfrað fram í gegnum aldirnar. Og þrátt fyrir að hún sé ræktuð útum allan heim með ágætum árangri er heimavöllur hennar Þýskaland þar sem gæði hennar verða mest og vínin sem úr þessari þrúgu fást geta verið einhver stórkostlegustu hvítvín þessa heims.

Hana má finna í allskyns útgáfum og margir þekkja hana í hálfsætum og töfrandi Kabinett-vínum frá vesturhluta Þýskalands og þá aðallega við árnar Rín og Mosel. Færri þekkja sætu Spätlese-, Auslese-, Beerenauslese- og Eiswein-vínin úr henni enda eru þau flest seld og drukkin af heimamönnum Þýðverskum. Á undanförnum árum (með hlýnandi loftslagi og breyttum smekk) þá hafa þýsku Rieslin-vínin svo í auknum mæli verið gerð þurr og alkóhólríkari (nær vínstílnum sem við þekkjum í Alsace) án þess þó að glata ferskleika sínum og núna má finna allskonar Riesling-vín í Þýskalandi, þurr og mikil og létt og fínleg og sennilega hafa þau aldrei verið betri en akkúrat núna.

Dr. Loosen ætti að vera öllum kunnur fyrir frábær vín sem hafa fengist hérna í gegnum tíðina og þetta hér, er einmitt eitt af hans betri, Großes Gewächs Riesling frá víngarðinum Sonnenuhr í þorpinu Wehlen í miðjum Móseldalnum. Þetta Großes Gewächs er reyndar hugtak sem hefur ekki sést neitt að ráði hérna heima en það er tiltölulega nýtt í þýskri vínlöggjöf. Það er best að útskýra það sem samsvarandi hugtak við Grand Cru í Frakklandi og þessa skilgreiningu má nota við þurr VDP-vín (VDP eru samtök bestu hvítvínsframleiðanda Þýskalands) frá bestu víngörðunum. Og þetta vín er einmitt eitt slíkt.

Það er strágyllt að lit með meðalopna angan af hvítum blómum, sítrónubúðing, verbena, fresíum, vínberjum, steinaávöxtum, ananas og eplaböku. Þetta er silkimjúk og örlítið búttuð angan, afar sumarleg og sætkennd.

Í munni er það hinsvegar þurrt og sýruríkt með fínlega og afar langa endingu. Þarna má finna sítrónu, verbena, ananas, steinaávexti, eplaböku, og mjúk steinefni. Þetta er flókið og fínlegt vín, afar lifandi og langvarandi þar sem hvert bragðið kemur á fætur öðru. Það er samt sem áður matarvænt, hefur heilmiklar töggur og þetta er vín sem ég get lofað að lifir og þroskast næstu tuttugu árin. Einstakt vín. Hafið með allskonar bragðmeiri forréttum, asískum mat, ljósu kjöti, feitum fiski og svo er það einnig íhugunarvín, svona eitt og sér. Ótrúlegt að hugsa til þess að meðan vínsnobbarar láta selja sér mun dýrari þorpsvín frá Búrgund þá hreyfist þetta vín varla í hillum vínbúðanna. Þetta hér er nebbnilega á pari við Grand Cru.

Verð kr. 3.995.- Frábær kaup.

Rauðvín ársins 2018 er svo Chapoutier Bila Haut Occultum Lapidem 2016 sem kemur frá Languedoc í Frakklandi.  Hörkuvín sem hefur fengið frábæra dóma og fengu bæði 2014 og 2015 árgangurinn af víninu 5 stjörnur hjá Víngarðinum.

M. Chapoutier Bila Haut Occultum Lapidem 2016 *****

Það er ekki langt um liðið að hér var dómur um árganginn 2015 af þessu frábæra víni og þá nefndi ég einmitt að sá árgangur væri væntanlega að hverfa úr hillunum og árgangurinn 2016 að taka við. Og það var ástæðulaust að hafa áhyggjur, árgangurinn 2016 er ekki síðri en 2015, en auðvitað dálítið yngri og það er ekki slæm hugmynd að kaupa nokkrar flöskur núna til að eiga á næsta ári. Eða næstu árin.

Einsog ég hef nokkrum sinnum útskýrt áður telst þetta vín vera gert innan hins skilgreinda víngerðarsvæðis Côtes-du-Roussillon Villages og er samsett úr þrúgunum Syrah, Grenache og Carignan þarna á Miðjarðahafsströnd Frakklands, nálægt landamærum Spánar. Það hefur mjög þéttan og ógagnsæjan, plómurauðan lit og meðalopinn ilm af jarðarberjum, kirsuberjum, hindberjum, sultuðum dökkum berjum, plómum, kaffi, nýrri mykju, ydduðum blýanti, tímjan, rósmaríni, brenndum við ásamt rykugum steinefnum.

Það er bragðmikið, þurrt og þétt en silkimjúkt. Lengi að koma og að sama skapi lengi að hverfa á braut, sýruríkt og jafnvel enn mýkra en árgangurinn 2015. Þarna eru gnótt rauðra berja, sultuð blá- og brómber, plómusulta, pipar, kaffi, fylltur lakkrís og jarðbundin steinefni. Vandræðalega gott að njóta þótt það sé svona ungt en hefur byggingu til að endast vel næstu 4-7 árin. Að einhverju leiti auðveldara í æsku en 2015 var og fer vel með bragðmiklum hátíðarmat, svíni, villibráð og lambi.

Verð kr. 3.595.- Frábær kaup.

Þess má geta að þrjú stigahæstu rauðvínin hjá Víngarðinum koma öll frá Vínfélaginu, Chapoutier Crozes Hermitage Les Meysonniers 2016 og Telmo Rodriguez Lanzaga 2012 voru í öðru og þriðja sæti á listanum